వనస్థలిపురంలో దారుణం.. కత్తిపోట్లతో వ్యక్తి హత్య

హైదరాబాద్‌ వనస్థలిపురంలో దారుణం చోటుచేసుకుంది. పనామా కూడలి సమీపంలో గుర్తుతెలియని దుండగులు ఓ వ్యక్తిని అత్యంత కిరాతకంగా హత్య చేశారు. ఆదివారం ఉదయం రోడ్డు పక్కన రక్తపు మడుగులో పడి ఉన్న మృతదేహాన్ని గమనించిన స్థానికులు వెంటనే పోలీసులకు సమాచారం అందించారు.

ఘటనా స్థలానికి చేరుకున్న వనస్థలిపురం పోలీసులు మృతదేహాన్ని పరిశీలించారు. మృతుడి శరీరంపై అనేక కత్తిపోట్లు ఉన్నట్లు గుర్తించారు. అయితే, మృతుడు ఎవరనేది ఇంకా తెలియరాలేదు. అతని వివరాలను సేకరించేందుకు పోలీసులు ప్రయత్నిస్తున్నారు.

ఈ హత్యకు గల కారణాలు ఇంకా స్పష్టంగా తెలియాల్సి ఉంది. పోలీసులు కేసు నమోదు చేసి దర్యాప్తు ప్రారంభించారు. ఆధారాల కోసం సంఘటనా స్థలం పరిసరాల్లోని సీసీటీవీ ఫుటేజీలను క్షుణ్ణంగా పరిశీలిస్తున్నారు. నిందితులను గుర్తించి పట్టుకునేందుకు ప్రత్యేక బృందాలను రంగంలోకి దించారు.